البرص

كل اللي حواليا عارفين عني أني مش بخاف من حاجة ...
لكن القريبين مني أوي عارفين أني عندي فوبيا حقيقية

من البراص أو الوَزَغ بالخليجي ..

يعني مثلا أنا لو طلعلي عفريت ممكن أعزمه

على نسكافيه وبسبوسة .. لكن البرص ممكن

يجَرّيني قدامه أميال لو جاله مزاج

معرفش الفوبيا دي أتـنقلت لأختي إزاي.. يمكن وراثة ؟

الموقف ده حصل من حوالي 4 سنين

كنت بايته عند أمي و طبعا يحلا السهر مع كوباية شاي بحليب أنا و أختي

أووووووووم أيه

فجأةً وإحنا قاعدين على سريرها بنتكلم

لقيت (بسم الله الرحمن الرحيم ) ( أعوذ بالله من الخبث

والخبائث ) ... بررررررررص

ماشي على الارض في الطرقة بالراحة وبيبصلنا من الباب

مبدأيا أنا جالي تشنج لمدة دقيقتين وده العادي

وهي فضلت ماسكة في دراعي و تقولي

أتصرفي

أبوس أيدك أتصرفي

المهم البرص لقانا شايفينه قام هربان للصالة

فقررنا إحنا الاتنين نكون أبطال و نمَوته

ماهو مش معقول هنصحي بابا الساعة

3 الصبح ونقوله في برص

ده كان أكّلهولنا صاحي

المهم أول حاجة عملناها إننا أستعدينا

رفعنا رجلين البيجامات

بتاعتنا لغاية الركب كده

آه عشان لو البرص قرب ميدخلش

في رجل البنطلون

وبعدين لبسنا إحنا الاتنين أحذية

بكعب عالى جدا عشان لو البرص مشي على

الأرض نبقا أعلا منه

كده بقينا متأمنين طيب فاضل الأسلحة

كل واحدة فينا جريت تدور على سلاح

اللي فكراه إن أختي مسكت في أيدها الشمال

مسّاحة الحمام و في أيدها اليمين بيروسول

أما أنا فجريت على المطبخ و مليت البويلر مياه و غليتها

و مسكته في إيدي اليمين و في الشمال مُكنسة ( مقشة )

لو نلاحظ هنا إن كلها أسلحة بتَعْمل

عن بعد .. يعني استبعدنا الشباشب وما شابه

المهم دورنا فلقينا البرص على الحيطه

وطبعا على ما خدنا القرار إننا نقرب منه

كنت أنا بهدلت الدنيا مياه مغليه

وأختي جابتلنا ذبحة صدرية من كتر البيروسول

وبرضو البرص هرب ونزل تحت السُفرة

المهم فضلنا واقفين مستنيينه يطلع

وفجأة ماما صِحيت على صوت الكركبة والكَحكَحه

فَتحِت باب الصالة شافت المشهد كالتالي

بناتها الاتنين اللي اعمارهم 30 و 20 سنة

واقفين بالكعب العالي و رافعين رجلين

البيجامات ورافعين أيديهم في الهوى

وطبعا انتو عارفين كنا ماسكين إيه

عمري ما هنسى منظرها وهي بتسألنا ومخضوضة

في ايه ؟ في ايه ؟

قولنالها برص يا ماما برص ..

بس متخافيش احنا هنموته

راحت ضاربه بأيدها على صدرها و قالت برص ؟؟

عليه العوض و منه العوض فيكم

يلا أمشوا من هنا ادخلوا ناموا

لو أبوكم صحي عليكم كده هتبقا ليلتكم سودا

فأحنا بصراحة كنا تعبنا

لأننا بقالنا نص ساعة واقفين بالكعب العالي مستنيين البرص

و انا كل شوية الاقي المياه بردت

واروح أغليها

فقولنا خلاص ننام

طب ننام ازاي مع البرص في بيت واحد

مفيش غير حل واحد

دخلنا اوضة اختي بسرعة و قفلنا الباب

و لزقنا لصق حوالين حلق الباب

وحطينا ملاية تحت عقب الباب وسدناه

وبكده مش هيعرف يوصلّنا.

ونمنا بالعافية

صحيت انا من النوم الصبح

وبفتح عيني لقيت البرص كان بايت معانا

أبن القديمة هرب من تحت السفره في حين غفلة مننا

و ملقاش غير أوضة

أختي و أستخبا فيها

كده الوضع تأزّم

قعدت أهزها علشان تصحا من غير ما أنطق

و أنا عيني متسمرة على السقف طبعا

هي بقا فتحت عينها و شافتني كده

برقت و فضلت بصالي

وانا مش بنطق ... وهي لسان حالها بيقول

ارجوكي متقوليهاش

المهم أختي دورت راسها براحة زي أفلام

الرعب وهي بتترعش لغاية ما وصلت للنقطة اللي أنا ببصلها و شافت البرص ..

قلتلها بهمس وإحنا مبرقين في السقف.. هنعمل إيه ؟

قالتلي برضو وهي بتوشوشني .. مش عارفه بس لازم نخرج

قولتلها قومي افتحي الباب

قالتلي قومي أنتي و اتغطي بحاجة وانتي

بتَعدي من تحتيه

قولتلها على جثتي

في اللحظة دي ماما كانت قررت انها تدخل تصحينا

وهووووب فتحت الباب

فطبعا اللزق اللي على حلق الباب

عمل صوت رهيب خلا البرص جري

في الاتجاه المعاكس ... يعني ناحيتنا

فالمشهد كان إن أمي فتحت الباب و احنا صرخنا

في وشها بصوت عالي جدا

الحمد لله جت سليمة و ماما محصلهاش حاجة

من الخضة

بس بعد ما فاقت ملقتش غيري طبعا

وهات يا زعيق علشان انا الكبيرة

و أختفى البرص

نفسي أفتكر بس مين اللي كان بيصورنا

فيديو وهي بتزعقلي ..

شخابيط

***