الجزء التاني
وصلت مصر و للأسف قضيت الأسبوع في السرير
أنفلوانزا شديدة جدا لكن اللي كان ممتع فيها
إن أمي حبيبتي كانت بتمرضني وكأني طفلة صغيرة
وكانت سيبالي أوضتها و سريرها كمان
تقريبا خمس أيام من الأسبوع راحوا هدر في السرير
وبسرعة جدا جه ميعاد الرجوع
توكلت على الله و روحت مطار برج العرب علشان أبدأ من جديد رحلة
الرجوع الطويلة
على حد علمي كانت طويلة بس مكنتش أعرف أنها هتكون طويلة أوي كده
اللي قرا البوست اللي قبله هيعرف إني منتظرني أربع ساعات ترانزيت في دبي
و المفاجأة أن رحلة إسكندرية – دبي فضلت تتأجل و تتأجل
لمدة 3 ساعات و نص
وده للأسف بسبب الكثافة الرهيبة و الضغط في المطار
لأن كل كل كل الناس اللي قدرت تسيب مصر قبل 30 / 6 سافرت
المهم
في خلال إنتظاري في مطار برج العرب
طبعا الناس قاعدين في وش بعض
قبل معاد الطيارة ب3 ساعات موجودين و عليهم 3 ساعات و نص تأجيل
يعني بقينا عِشرة
و الموضوع الرئيسي كان الثورة وما شابه
لفت أنتباهي بنتين وولد شكلهم من الهند لا محالة
لبسهم هندي
شكلهم هندي
بياكلوا مانجة هندي
و بيشربوا تمر هندي
ههههههههههههههههههههههه
الله يرحمه فؤاد المهندس
هوا أنا كنت بقول إيه ؟
آه
كنت بقول بنتين و شاب شكلهم هندي
البنات كانوا بيبصولي كتير معرفش ليه
لدرجة أن عيني جت في عنيهم أكتر من مرة وده اللي خلاني
خدت بالي منهم
وجه ميعاد الطيارة أخيررررررا
و كنت أول واحده ركبتها
أووووووم إيه
يطلعوا الهنود إياهم راكبين جنبي
بنت منهم و الولد في الكرسيين اللي جنبي و البنت التانية كانت على
الضفة المقابلة
شوية بقا و بدأت البنت تتكلم أخيرا و تعلن عن فضولها و تسألني
أنتي مصرية ؟
قولتلها أيوا
قالتلي أنا بحب مصر أوي
قولتلها طبعا إنتي هندية
قالتلي لأ
أنا من جزر المالديف
أجمل مكان في العالم
وفي ثانية فتحت الموبيل و طلعت صور تجنن
تهبل
تخبل
لشواطئ زي اللي بنعملها كده خلفيات لللابتوب
وقالتلي ده وطني وهي فخورة جدا
و قالتلي إنها هي و جوزها طلبة في الأزهر
وشاورتلي على الأخ اللي معاها
طبعا أنا أتصدمت دول شكلهم عيال يعني
إزاي بقا متجوزين و كمان في الأزهر !!
البنت لما لقيتني أندهشت و إزبهليت
ضِحكت و قالتلي إحنا كان بيحصلنا مشاكل كتير في مصر
ومحدش كان بيصدق إننا متجوزين فبقينا ماشيين بأوراقنا
الرسمية طول الوقت
و قالت كمان إنهم عاوزين يلحقوا يسافروا من مصر
قبل 30 / 6 و طبعا السبب مفهوم
و إتكلمت شوية عن تكاليف الدراسة
وإن أهلها و أهله بيساعدوهم علشان يتعلموا في الأزهر بمصر
و إنهم إستغنوا عن تأسيس بيتهم وما شابه عشان يوفروا للدراسة
ده غير إنهم بيطيروا حوالي 20 ساعة رايح و زيهم جاي
بس المعلومة دي من البنت والله أعلم بصحتها
لكن
بجد هم الأتنين نموذج مشرف
إحنا بس اللي مش عارفين قيمة بلدنا
ووصلت الطيارة مطار دبي
من هنا بقا بدأ فيلم تيرمينال لتوم هانكس
وصلت الطيارة زي الفل لمطار دبي
ناس كتير راحت عليهم رحلتهم طبعا ووقفوا في طابور طويل عريض
علشان يصلحوا المشكلة
لكن أنا الموظفة قالتلي إني أوك و طيارتي لسه موجوده
فرحت جدا طبعا و أشفقت على اللي فاتتهم الرحلة
بس مش أوي
وقتها كانت الساعة 12 نص الليل أو 11 مساء أو 1 صباحا
وده يتوقف على البلد اللي أنت فيها
فرق توقيت
وطبعا لأني إضربت في خلاط خلا توقيت مصر و الأمارات و السعودية دخلوا في بعض
مفهمتش إني كان لازم أجرررررررررري لباب الطيارة و إن كلها دقايق و تفوتني الرحلة
Sorry madam you missed your flight
دي الكلمة اللي قالهالي موظف الإستقبال
كتبتها بالأنجليزي لأن وقعها كان مش سهل عليا وقتها
على فكرة الإحساس ده للي مجربهوش قبل كده – رهيييب
خصوصا في بلد غريبة
شبكات الموبيل فيها مشغلتش ولا خط من اللي معايا سواء مصري
أو سعودي وحتى لو أشتريت خط إماراتي
قالولي مش هيشتغل غير بعد يومين
أكيد كنت محتاجة أعتذر عن تأخيري على الأقل
هكمل الحكاية و إزاي قضيت يوم كامل في مطار دبي
في البوست اللي جاي
شخابيط
.....
ليست هناك تعليقات:
إرسال تعليق