دعوة للتقييم

البوست ده بقالي فترة بفكر فيه لكن مكنتش عارفه أصيغه في هيئة كلام مرتب

فقررت إنهارده انه يتكتب زي ماهو وخلاص

هو الواحد لو جرب انه يتجرد من لقب عيلته و لقب مهنته و من ولاده و من فلوسه ومن هدومة السي نيـيـه وساعته اللي بألافات.. يعني كل حاجة مكتسبة ..و يقف كده قدام المرايا من غير ولا حاجة و يبص لنفسه شويه

ياترى هيشوف ايه ؟؟

ياترى قيمته هتكون في إيه و مستمتده من ايه ؟

للأسف في ناس لو أتجردت من كل ده وجت تبص في المرايا هتلاقي نفسها أختفت .

وفي ناس تانية مش هيفرق معاها كل ده لأنها مش بتستمد قوتها من لقب يتقال قبل اسمها ولا من موظفين تحت ايدها بيهللوا و لا من عيلة لها اسم .. لأ .. الناس دي بتستمد قوتها من الحب و العطاء و القيم و المبادئ و الحاجات دي اللي مبقتش تأكل عيش في الزمن ده .

ياريت كلنا نقيّم نفسنا و نشوف يا ترى لو بقينا من غير كل الحاجات المكتسبة دي .. نستاهل أصلا إن حد يعرفنا أو يحبنا ؟

شخابيط

الصورة المرفقة من شخابيطي