السلام عليكم ورحمة الله
انا للأسف الشديد حذفت جميع التعليقات السابقة في كل بوستاتي بالخطأ وبدون قصد
وده ضايقني فعلا لأني كنت بعتز بيها جدا
لو حد عنده الحل يا ريت يقولي ارجعها ازاي
ولو محدش عنده حل يا ريت كل اللي علقوا عندي يعرفوا ان الحذف تم بدون قصد
شكرا
شخابيط
.
هناك تعليقان (2):
شقى عمرى :)
- حد يحذف التعليقات من غير ما يعرف يرجعها ازاى ؟
- أصل ده كان من اختصاص ابو دهشوم والدفاس ...!
- أنزل معايا ف الملاحه :)
من المفترض أن أى تعليق بيوصلك على الأميل اللى أنتى فتحتى بيه المدونه ... فأكيد كل تعليقاتك وتعليقات الضيوف بتبقى ع الأميل :)
يعنى أنا على أميلى كل التعليقات اللى بعتها على مدونتك وردودك عليها
وعلى سبيل المثال وليس الحصر :
بوست البرص :
ENG./ELSAYED,PMP تعليقًا جديدًا على الرسالة المعنونة بـ "البرص":
هنا فى احتمالين :
الاحتمال الاول : ان البرص اثناء مطاردته فى أوضة السفره تسلل مره اخرى الى أوضة النوم ... وانتوا قفلتوا عليكوا الاوضه ونمتوا ولزقتوا الباب ... وده السيناريو اللى انتى تخيلتيه
الاحتمال التانى : ان كان فيه اتنين برص ... وده وضع طبيعى ... ايه اللى يخلى البرص ده يعيش وحيد ف بيتكم ... اكيد كان متجوز عندكم ... وده سيناريو واقعى جدا
السؤال هنا ... يعنى خلصتوا عليه ولا لااء ؟
ترك جيلان حمزة تعليقًا جديدًا على الرسالة المعنونة بـ "البرص":
متجوز وعايش كمان ؟ هههههههههه
على اي حال الحمد لله اني مفكرتش في الاحتمال التاني وقتها ...والله كان جرالي حاجة.
لا مخلصناش عليه هو أختفى وبس .. تفتكر يكون خد مراته ومشي من بيت المجانين ده ؟ يمكن محبش ياخد الريسك أنه يتعرض للمياه المغليه أو البيروسول تاني ههههههههههه ..ريسك ..ريسك ... هو انا سمعت الكلمة دي فين ؟؟؟ (:
أنا فعلا لما بشوف الفيديو اللي مش عارفه مين صورهولي ساعتها بحس أد أيه أنا بخاف من البرص و شكلي بيبقا شبه اللي عندهم صرع ههههههه
شكرا لمرورك و تعليقك الظريف
ترك P A S H A تعليقًا جديدًا على الرسالة المعنونة بـ "البرص":
ههههههههههههههههههههههههههههههههه
يا نهار ع الضحك
:)
ربنا يسعدك يا رب
هو البرص فعلاً شكله مقرف وبيعصبني بصراحة !!
كان فيه موقف غريب برضه حصل لي بس مع صرصار !!
كنت مرة باشتري فينو من الفرن ، وسامع البنات اللي شغالين جوه الفرن بيصرخوا وبيضحكوا ضحك هيستيري ؛ وأنا مش فاهم فيه إيه ؟؟ وبعدين لقيت تلات أربع بنات خارجين بيجروا بمقشات ومساحات وهما غرقانين في الدقيق زي ما يكونوا بيطاردوا يشبح مش شايفه !! فالبنت بتاعت الكاشير بتسألهم فيه إيه قالوا لها صرصار كبير من اللي بيطيروا !! فالبنت اتلبشت وراحت رافعة رجليها وقعدت مربعة ع الكرسي ؛ وبعدين لقيتهم كلهم سكتوا وبصوا لي جامد قوي ، أتاري الصرصار بسلامته جه وقف على كتفي ، فرحت رامي الفلوس للبنت ومنفض القميص ناحيتهم وأنا باقول للصرصار بسك عليهم هههههههههههههه
وخدت بعضي وهرولت خارجاً :)
المهم الفيديو ده فين دلوقت ؟؟
D:
ترك جيلان حمزة تعليقًا جديدًا على الرسالة المعنونة بـ "البرص":
ههههههههههههه موتني ضحك على البنات اللي كلهم دقيق وبيطاردوا شبح ههههههه والله بكتب التعليق وانا لسه بضحك
الفيديو ده انا مسحته وبعدين ظهرت منه نسخ تانية مع أختي وبقالها 4 سنين بتبتزني بيه بس انا مسكتش وطلعتلها صورة ليها وهي صغيرة تحفه كنت شيلاها للزمن ودلوقتي الفيديو عندها
مرورك اسعدني جدا
تحياتي الحارة
انما ازاى نسترجعها فى مكانها فى البوستات فاحب اقولك وبكل فخر واعتزاز
.
.
.
.
معرفش
:)
ENG./ELSAYED,PMP
طيب معاك ايميل ابو الدهشوم او الدفاس ؟ هههههههههههه
شكرا بجد للإهتمام و الرد
بالنسبة للتعليقات طبعا موجوده على الميل عندي بس هي اتحذفت من المدونة نفسها وده اللي ملقتلهوش حل لأن مفيش Recycle Bin في صندوق التعليقات بتاع بلوجر .
شكرا مرة تانية
إرسال تعليق