عندما يتساوى الأبيض والأسود

عندما يقرر من حولك بأنك منبوذا ليس لسبب تعلمه

عندما يقرر شريك حياتك أنه لم يعد بحاجة إليك بعد الآن

عندما يقرر مديرك أنك لم تعد تصلح للعمل

أو يقرر أبناؤك التخلي عنك

تشعر بأن القدر يسخر منك

تفقد الرغبة في البكاء وتفقد الرغبة في الابتسام على حد سواء

حينها تتساوى الألوان وتتوحد المشاعر

يصبح الأبيض مثل الأسود

تنظر للسماء فلا تجد فرقا بين الليل والنهار

ولا فرقا بين طعام و آخر

ولا حتى بين التنفس و الموت

تشعر بأنك تنظر للعالم نظرة بلهاء جامدة

فقط استسلم لبرهة واستمتع بكونك بلا ألم ولا سعادة

استمتع بأنك تعيش مؤقتا في المنطقة الرمادية

فان مقاومة الموج تسبب الغرق

والرمال المتحركة تلتهم من يعاديها بسرعة اكبر

اترك المشاهد تمر أمام عينيك و تظاهر بأنك لست جزءا منها

استرخ

دع الهدوء يتخلل كل خلاياك

لا تلم نفسك ولا تصب اللعنات على غيرك

لن تطول فترة السكون

تذكر انه لا شئ يبقى على حاله

وان العاصفة قادمة لا ريب

فقط ادعي الله أن تكون عاصفة ممطرة

حتى ينبت الزرع وتتفتح الورود

ولا ترهق نفسك بانتظار المطر

هذه ليست دعوة للسلبية

ولكنها دعوة لترك فترة الإحباط واليأس تمر في سلام

ليبدأ من بعدها

موسم الحصاد

شخابيط

* * *

الصورة المرفقة من شخابيطي

بدون قصد

السلام عليكم ورحمة الله

انا للأسف الشديد حذفت جميع التعليقات السابقة في كل بوستاتي بالخطأ وبدون قصد

وده ضايقني فعلا لأني كنت بعتز بيها جدا

لو حد عنده الحل يا ريت يقولي ارجعها ازاي

ولو محدش عنده حل يا ريت كل اللي علقوا عندي يعرفوا ان الحذف تم بدون قصد

شكرا

شخابيط

.

البرص

كل اللي حواليا عارفين عني أني مش بخاف من حاجة ...
لكن القريبين مني أوي عارفين أني عندي فوبيا حقيقية

من البراص أو الوَزَغ بالخليجي ..

يعني مثلا أنا لو طلعلي عفريت ممكن أعزمه

على نسكافيه وبسبوسة .. لكن البرص ممكن

يجَرّيني قدامه أميال لو جاله مزاج

معرفش الفوبيا دي أتـنقلت لأختي إزاي.. يمكن وراثة ؟

الموقف ده حصل من حوالي 4 سنين

كنت بايته عند أمي و طبعا يحلا السهر مع كوباية شاي بحليب أنا و أختي

أووووووووم أيه

فجأةً وإحنا قاعدين على سريرها بنتكلم

لقيت (بسم الله الرحمن الرحيم ) ( أعوذ بالله من الخبث

والخبائث ) ... بررررررررص

ماشي على الارض في الطرقة بالراحة وبيبصلنا من الباب

مبدأيا أنا جالي تشنج لمدة دقيقتين وده العادي

وهي فضلت ماسكة في دراعي و تقولي

أتصرفي

أبوس أيدك أتصرفي

المهم البرص لقانا شايفينه قام هربان للصالة

فقررنا إحنا الاتنين نكون أبطال و نمَوته

ماهو مش معقول هنصحي بابا الساعة

3 الصبح ونقوله في برص

ده كان أكّلهولنا صاحي

المهم أول حاجة عملناها إننا أستعدينا

رفعنا رجلين البيجامات

بتاعتنا لغاية الركب كده

آه عشان لو البرص قرب ميدخلش

في رجل البنطلون

وبعدين لبسنا إحنا الاتنين أحذية

بكعب عالى جدا عشان لو البرص مشي على

الأرض نبقا أعلا منه

كده بقينا متأمنين طيب فاضل الأسلحة

كل واحدة فينا جريت تدور على سلاح

اللي فكراه إن أختي مسكت في أيدها الشمال

مسّاحة الحمام و في أيدها اليمين بيروسول

أما أنا فجريت على المطبخ و مليت البويلر مياه و غليتها

و مسكته في إيدي اليمين و في الشمال مُكنسة ( مقشة )

لو نلاحظ هنا إن كلها أسلحة بتَعْمل

عن بعد .. يعني استبعدنا الشباشب وما شابه

المهم دورنا فلقينا البرص على الحيطه

وطبعا على ما خدنا القرار إننا نقرب منه

كنت أنا بهدلت الدنيا مياه مغليه

وأختي جابتلنا ذبحة صدرية من كتر البيروسول

وبرضو البرص هرب ونزل تحت السُفرة

المهم فضلنا واقفين مستنيينه يطلع

وفجأة ماما صِحيت على صوت الكركبة والكَحكَحه

فَتحِت باب الصالة شافت المشهد كالتالي

بناتها الاتنين اللي اعمارهم 30 و 20 سنة

واقفين بالكعب العالي و رافعين رجلين

البيجامات ورافعين أيديهم في الهوى

وطبعا انتو عارفين كنا ماسكين إيه

عمري ما هنسى منظرها وهي بتسألنا ومخضوضة

في ايه ؟ في ايه ؟

قولنالها برص يا ماما برص ..

بس متخافيش احنا هنموته

راحت ضاربه بأيدها على صدرها و قالت برص ؟؟

عليه العوض و منه العوض فيكم

يلا أمشوا من هنا ادخلوا ناموا

لو أبوكم صحي عليكم كده هتبقا ليلتكم سودا

فأحنا بصراحة كنا تعبنا

لأننا بقالنا نص ساعة واقفين بالكعب العالي مستنيين البرص

و انا كل شوية الاقي المياه بردت

واروح أغليها

فقولنا خلاص ننام

طب ننام ازاي مع البرص في بيت واحد

مفيش غير حل واحد

دخلنا اوضة اختي بسرعة و قفلنا الباب

و لزقنا لصق حوالين حلق الباب

وحطينا ملاية تحت عقب الباب وسدناه

وبكده مش هيعرف يوصلّنا.

ونمنا بالعافية

صحيت انا من النوم الصبح

وبفتح عيني لقيت البرص كان بايت معانا

أبن القديمة هرب من تحت السفره في حين غفلة مننا

و ملقاش غير أوضة

أختي و أستخبا فيها

كده الوضع تأزّم

قعدت أهزها علشان تصحا من غير ما أنطق

و أنا عيني متسمرة على السقف طبعا

هي بقا فتحت عينها و شافتني كده

برقت و فضلت بصالي

وانا مش بنطق ... وهي لسان حالها بيقول

ارجوكي متقوليهاش

المهم أختي دورت راسها براحة زي أفلام

الرعب وهي بتترعش لغاية ما وصلت للنقطة اللي أنا ببصلها و شافت البرص ..

قلتلها بهمس وإحنا مبرقين في السقف.. هنعمل إيه ؟

قالتلي برضو وهي بتوشوشني .. مش عارفه بس لازم نخرج

قولتلها قومي افتحي الباب

قالتلي قومي أنتي و اتغطي بحاجة وانتي

بتَعدي من تحتيه

قولتلها على جثتي

في اللحظة دي ماما كانت قررت انها تدخل تصحينا

وهووووب فتحت الباب

فطبعا اللزق اللي على حلق الباب

عمل صوت رهيب خلا البرص جري

في الاتجاه المعاكس ... يعني ناحيتنا

فالمشهد كان إن أمي فتحت الباب و احنا صرخنا

في وشها بصوت عالي جدا

الحمد لله جت سليمة و ماما محصلهاش حاجة

من الخضة

بس بعد ما فاقت ملقتش غيري طبعا

وهات يا زعيق علشان انا الكبيرة

و أختفى البرص

نفسي أفتكر بس مين اللي كان بيصورنا

فيديو وهي بتزعقلي ..

شخابيط

***

اعتذار

كِدت أن تُثنيني عن قراري

أن تجعلني أكسر وعودي لنفسي

أن تجعلني أُنكِس راياتي و أقدم مرة أخرى ..على الانتحار

وعدت نفسي بأنه بعد اليوم

لا حب

لا سهر

لا اشتياق

ولا انهيار

وعدتها بألا يفوح العطر من جسدي الا لنفسي

وألا انفق ساعة أخرى من عمري أنتظر أحداً إلا نفسي

بألا أبكي حبيبا

و

لا أشتاقُ لغائب

ولكن يالغبائي

فقد كِدت أكسر وعودي وعهودي

واضطررت للمرة المليون ان

اقدم اعتذاري

أَعتذر لأني رأيت ذلك الضوء في مقلتيك

كالشمعة تُضئُ لمن ضل الطريق وَسط الظلمات

لأني رأيت نورك وقد رسم لي ظلا فوق الأرض وعلى الجدران

أنا التي عاشت بلا ظِل .. كما الأموات

لأني لمحت في ابتسامتك الشفافةِ طهارةً ونقاء

لأني صدقت أنك تُقَدم الورد بلا مقابل

وتعرض أن ترافقني في أسفاري دون مقابل

لأني صدقت بانك سترفع عني طوق الشوك ولا تسأل في الحب مقابل

صدقتك و لكني أُقدم اعتذراري

للمرة المليون ... أقدم اعتذاري

لم يكن هناك بُدٌ من لقائنا

من حديثنا

من ضحكنا و لهونا

ولم يكن هناك بد من الهجر و الفرارِ

ولكن اعلم جيدا يا رفيقي

بأني لست أنا التي كانت

وبأني لن أبكيك

ولن أَذبح نفسي قُربانا للقرار

وانه لن يلزمني سوى بضع ثوانٍ

لأمضي في طريقي

وحدي .. مع نفسي

ومع أعذاري

أنا لن أصاب بحَجَرٍ مرة أخرى

لن أحلم مرة أخرى

لن انتظر مرة اخرى

ولن أبكي على قَدَمِ رجل مرة أخرى

إذهب حيث تشاء

عُد لديارِك خَزياً مهزوما .. تائهاً في الصحراء

لقد استعدت جنودي

ولملمت اوراقي

وما بقي منك هو غنيمةً لي

ولن أكتب فيك حتى .. كلمة رثاء

فأوراقي و حبري و اقداحي وسهري

لي وحدي

وقد تخليت عن الرفقاء

وسوف تذهب أنت .. و سوف تَكونُ نَسيا مَنسيا ..عندما يحل المساء

وسوف تُشرق الشمس لي وحدي

ويُكتَب الشِعرُ لي وحدي

ويكون القرار بيدي .. وحدي

فانا لم أُخلق للحب

ولا للاشتياق

لم أُخلق للوعود الجوفاء

وإن لم يكن على ظهر الدنيا ملكا يُتَوج مملكتي

فالحرب إذاً على جميع الدخلاء

اذهب الآن فأنت مثلهم جميعا

مملوكا .. ولَستَ من النبلاء

أنا لم أخلق مثل جميع النساء

لم أخلق للحب

ولا للاشتياق

ولم أخلق للوعود الجوفاء

بقلمي

شخابيط

. . .

الصورة المرفقة من رسوماتي

إبتسم يا عزيزي أنت فرد من القطيع

تعريف القطيع : هو مجموعة من الأفراد من نفس النوع يشكلون قبيلة تعيش تحت قيادة فرد منهم .

والفرد المسيطر ده أو القائد بيتغير لما تضعف مقومات القياده فيه

يعني مثلا في عالم الحيوان يِفْضَل القائد قائد لغاية ما يطلع فرد جديد من القطيع يكون

أقوى و أصبا منه و ياخد مكانه

بس مش ده المهم

المهم

1- سياسة القطيع

2- أسباب إنضمام الأفراد للقطيع

3- كيفية السيطرة على القطيع

سياسة القطيع هي الطاعة والولاء للقائد و الإنصياع التام لرغباته و قراراته بدون تفكير

أما بقا أسباب إنضمام الأفراد للقطيع فهو البحث عن الأمان سواء كان ضد الجوع أو الموت

أو أي مخاطر تانية

بالتالي تكون السيطرة على القطيع هي في إستخدام الغرائز و أهمها الخوف و الجوع و يليها الجنس

فلو بصينا لكل اللي فات نقدر نقول

إن ده قطيع

وده قطيع

وللأسف ده كمان قطيع

إبتسم يا عزيزي أنت فرد من القطيع

أيوا والله إنت كده ... طيب أقولك ؟ و أنا كمان كده

نفهم الموضوع ماشي إزاي و بعدين أحكم بنفسك

من قرون كتير فاتت بدأ الإنسان يفكَر في تكوين جماعات

مواصفات الجماعة عموما أن يكون لها قائد و إن أفراد الجماعة لا تخرج عن السياق المرسوم ليها

في مقابل تأمين بعض الإحتياجات و دي هنتكلم عليها في سطور جاية

كيف تُكَوّن جماعة أو قطيع...!

الطريقة بسيطة

أولا : سيطر على الغريزة

لو خدنا مثال الجماعة الماسونية

لما بدأت الجماعة دي كانت سرية أو بالأصح ده اللي كانوا بيجذبوا بيه الأفراد ليهم

ومجرد ما يحاول الفرد يدور على الجماعة المحاطة بالأسرار الخفية

يصطادوه و بعدها تبدأ عملية السيطرة على الغرائز

لو بنتكلم هنا عن الماسونية فكانوا بيستخدموا غريزة الخوف

العضو الجديد كان بيتعرض لجو مرعب أثناء قَسَم اليَمين

وبيقابل القائد اللي هيتبعه جغرافيا ... في جو من الرهبة و الخوف

يعني بيدخل غرفة مظلمة و هو معصوب العينين و الغرفة فيها جماجم و أضواء خافته

بالتالي يبدأ الخوف و يبدأ الولاء أول ما يفتح عنيه

في جماعات تانية بتستخدم غريزة حب السلطة و الفلوس و الوعود الكبيره بيهم

وفي جماعات بتستخدم الجنس.. زي جماعات الشواذ وعَبَدِة الشياطين مثلا

مش بس كده ده ممكن جدا السيطرة على شعوب كاملة

المفتاح بسيط

الشعب الفقير إمنع عنه القمح و السكر و البترول وإقطع عنه الكهربا ..وأديهم له بالقطّارة

هيتبعك وهتكون قائد القطيع

أما الشعب اللي معروف عنه إنه متدين بطبعه إخلقله جماعات تتكلم بإسم الدين

وهيتبعك بدون نقاش

وشوية شوية هتبقا الجنه في أيدك و مخالفتك حرام

ولا تسأل و لا تجادل يا أخ علي

و أخيرا و ليس آخرا المجتمع اللي فيه إستعداد للحروب الأهلية

إستخدم معاه سياسة فَرِق تَسُد

عرفت بقا إنك فرد من القطيع ؟

طيب أيه الهدف أساسا من كل ده ؟؟

غالبا بيكون أفراد القطيع اللي هم قاعدة الهرم مش فاهمين الأهداف الحقيقية من ورا

التنظيم أو القيادة اللي هم تابعينلها

ولو رجعنا للمثال الأول اللي هو الجماعة الماسونية

هنلاقي إن الأعضاء الجدد و اللي هم بيشكلوا الدم الجديد دايما .. دول بيدخلوا الجماعة

على إنها وسيلة لنشر فكرة الخير و الحب و السلام

و مبيعرفش الأهداف الحقيقية غير القلة القليلة منهم اللي هم القاده و بيكون ليهم

ترتيب هرمي وصولا للزعماء و ده بيكون بالأقدمية ... يعني للي فاهمين اللعبة كلها.

وبالطريقة دي قدرت الماسونية تتسبب في حروب كاملة زي الحرب العالمية الأولى مثلا

وهكذا

ثانيا : بعد ما سيطرْت على الغريزة إبدأ في زراعة أفكارك و لإنك ليك اليد العليا

هتلاقي السمع و الطاعة و بالتدريج هيبدأ الفرد يحس بالخوف و الهلع

من فكرة سقوط جماعته لدرجة ممكن تخليه يضحي بحياته

وبكده يكون القاده ضامنين الأستمرارية

في عالم الحيوان القائد له مميزات مَنكِرش لكن في النهاية كلها فطرية غريزية

يعني بيكون له حظ أوفر من الإناث

وأحيانا أفضلية و أسبقية في تناول الطعام

لكن في عالم البشر الوضع مختلف

الحكاية مش أكل و شرب لأ

الحكاية سلطه و سطوة و بُرصة وحسابات في بنوك سويسرا و حَصَانات و علاقات

حاجات فعلا ممكن تخلي أي حد ممكن يعمل أي حاجة علشان

يكون القائد

تسألني و تقولي طيب أنا كده لو خرجت من القطيع لا هيبقا ليا بلد و لا حكومة وأنا ضامن نفسي

لكن غيري ممكن يسرق و ينهب و تبقا الدنيا فوضى

طيب نتكلم واحده واحده ويا تقنعني يا أقنعك

بزمتك يا أخي عمرك شوفت قطيع أسود ؟

طيب عمرك شوفت قطيع سمك قرش ؟

طبعا لأ و علشان كده هم الملوك ... يا أخي ده كل فرد فيهم بنقوله يا ملك

لكن إحنا بقا بنزرع في العيل من وهو لسه عمره ست سنين إنه فرد من قطيع

ولازم يتبع التعليمات

نلبسهم لون واحد في المدرسة

ويمشوا في طابور ورا بعض و يا ويله اللي يطلع من الطابور

ولو الولد عبّر عن رأيه يبقا قليل الأدب

أنا مش بشجع الفوضى .. لكن هل في مدرسة واحده بتعمل ولو يوم في الشهر

للولاد الصغيرين يكونوا بحريتهم ؟؟

يعبروا عن رأيهم حتى لو بيشتموا المدرسة و المدرسين

أي حاجة بس المهم يفهموا

إنهم مش قطيع

جميل يعني أنا أعمل أيه دلوقتي ؟؟

أقولك

فكر

شَغّل العده اللي ربنا مديهالك في راسك دي و اللي هي السبب في كل اللي وصلناله

ولسه هنوصلّه

ببساطة شديدة إرجع للمنطق

لو كلنا فكرنا بالمنطق و العقل هنوصَل لنفس النتايج و بطريقة مزهلة

ساعتها هنكون قطيع بتحكمه مصالحه مش مصالح قياداته

يعني أيه ؟

يعني تقوم الحكومات و الدول على مبدأ المواطنة وبس

دستور أو بابور أو أي حاجة تتعمل تكون للصالح العام

من غير ما نبص لدين و لا عرق و لا لون ولا جنس و لا حتى سن

لأن هم دول اللي بيجرجرونا ورا ناس عايزة تحكمنا لحساب مصالحهم الشخصية

وبيستغلوا إختلافاتنا للسيطرة علينا

وبالتالي الوصول لأهدافهم

الديموقراطية اللي أخترعوها الغرب علشان يخلونا ناكل في بعض

و هُم أساسا مش بينفذوها في بلادهم

نجرب إحنا نفكر فيها شويه ونعدّلها شويتين و نأيفها علينا

صدقني ساعتها كلنا هنروح للمصلحة العامة من غير ما حد يركبنا

يا أخي ده ربنا اللي أسمه ربنا

مخلاش بيننا و بينه وسيط

حد فكر في السبب ؟

السبب أنه محدش يتحكم فيك و يقولك أنا أقرب لله منك

أنا الزعيم

هي دي البساطة اللي لو خدناها من دين الأسلام الحنيف كل حاجة ممكن تتصلح
ونبطل بقا نمشي في القطيع

ملحوظة : كل الكلام اللي فات رؤيتي الشخصية و بس .

إمضاء : شخابيط

.....

سَفرية ( الجزء الثالث والأخير )

بعد ما الطيارة فاتتني و الحمد لله

رحت طبعا للموظفين اللي عند ال Gate و سألتهم أول حاجة عن شنطتي

قالولي إنها نزلت من الطيارة و محبوسة معايا

طبعا اشطت غيظا

قولتلهم يعني لما أنتو عارفين أن في حد مركبش الطيارة

وكمان عرفتوا أسمي و نزلتوا شنطتي

مهنش عليكم تندهوا أسمي ولو مرة واحده ؟

طيب بلاش ... أنتو ليه مش بتنادوا على الرحلات في

ميكروفون زي بقيت المطارات في الدنيا كلها ؟

ده في مصر بينادوا على الرحلة و حطين سماعات في كل

مكان حتى الحمام والله و ساعات نسمع في المطار
ينادوا على إسم حد

متأخر عن رحلته و يطلبو منه سرعة التوجه للبوابة

معقولة ؟ بقا دبي و هيلمان دبي ممعهمش حق الميكروفونات ؟

جت بنت كيوت كده منهم و كلمتني على جنب

هي شكلها مدّي على روسي

وشوشتني و قالتلي إني ممكن أكلم الريّسة بتاعتهم

بس أكلمها بزوق و بالبلدي يعني أتمسكنلها عشان تطلعني على الرحلة

اللي جاية من غير محجز تذكرة

ههههههههههههههههههه

هم يبكي و هم يضحك .. أنا كنت بحسب الطريقة دي بيتكلموا بيها

الستات الموظفات في الإدارات الحكومية عندنا في مصر و بس

ده طلع تنظيم عالمي

المهم قولتلها أنا مش محتاجة أعمل كده علشان إخد حقي

أنا طيارتي أتأخرت و هي اللي أخرتني و دي نفس شركة الطيران

فخدتني للريّسة و كانت شرق أسيوية تدّي على ماليزي أو تيلاندي

بصراحة برضو طلعت زوق جدا

وعموما دي أكبر ميزة كانت في مطار دبي ..إن كل اللي بيشتغلوا هناك

متعاونين ..

بس مهما كانت متعاونة مش هتقدر تطلعلي يعني طيارة مخصوص

هي آخرها حطتني على الرحلة اللي بعدها

واللي تطلع تاني يوم الساعة 4 العصر

يادي المصيبة ... هقعد كل ده ؟؟ طيب يا جماعة أخرج أتفسح بقا في دبي

لقيتها إجراءات و شغلانة و الوقت بعد نص الليل

فقلت لنفسي بلاش الله يخليكي و كفاية كده خلي السفرية دي

تعدي على خير

قعدت مع نفسي دقايق و قررت أغير إحساسي

وقولت هعتبرها رحلة وهحاول أستمتع بالوقت ده

بعد شوية قابلت الريسة و كنت بسألها عن شنطتي فلقيت معاها موظف تاني

كلمني عربي

كنت عاوزة أقوله إنت حقيقي ولا بجد ؟

طب قول أي حاجة عربي تاني كده ههههههه

المهم طلع سوري وكان زوق جدا

وقاللي إني من حقي أقضي الليلة في ضيافة شركة الطيران

وقالي أنتظري لحظة و رجع و معاه ورق علشان العشا و الفطار من

ماكدونالد المطار و قاللي كان المفروض فندق بس

معرفش يتصرف أكتر من كده

شكرته جدا طبعا

و قعدت أرسم دودلز لما أتعميت و بعدين

أكتشفت إن في ستات في المسجد نايمين قولت أجرب

طبعا كانت تجربة صعبة جدا لكن من التعب نمت فعلا

حوالي 3 ساعات و صحيت كانت الساعة 8 الصبح

على صوت بنتين وولد و أمهم بتقولهم هش هش و هم مش بيهشوا خالص

لما فتحت عنيا إبتسمتلي فقولتلها هي الساعة كام بالعربي

إكتشفت إنه مفيش عربي ههههههه

رغينا مثلا مع بعض ساعة أو أكتر

عرفت منها إنها أصلا باكستانية و بقت كندية يعني عايشة في

كندا مع أولادها

وفجأة و إحنا بنتكلم لقيتها بتحكيلي عن جوزها و عن صحباتها و أنا

أتكلمت معاها كتير كمان

أحيانا بترتاح لما بتتكلم مع حد متعرفهوش ولا هتشوفه تاني

أكتر من لو إتكلمت مع صديق

هي بقا وصلت لحد الفضفضة و مشاكلها مع جوزها .. ده غير كلام عام

مثلا زي المشاكل اللي إتعرضلها المسلمين في الغرب بسبب العيال السود

اللي دبحوا واحد في الشارع

بصراحة كانت ست ظريفة جدا بس مش هحكي الحوار اللي دار

بيني و بينها أكتر من كده

بعدين خرجت من المسجد و أنا حاسة إني في بيتنا

أه والله و ساعتها بجد إفتكرت توم هانكس في فيلم تيرمينال

ده أنا حسيت بتآلف مع المطار من ليلة ...أمال اللي قعد مده يحس بأية

قمت بقا و غسلت وشي و ظبطت مكياجي و خدت نسكافيه و ساندويتش من ماكدونالد

و دخلت السوق الحرة و تحديدا قسم المكياج

كنت بدور عن حاجة معينة و ملقتهاش بسهولة

رحت لموظفة في المكان و قلتلها إني محتاجة مساعدة

كانت بنت أمريكية من سني تقريبا

المهم روحنا ندور سوا في الماركات اللي معروضة و بدأنا نجرب درجات الألوان على

أيدينا ... بعدين الموضوع كبر معانا و قعدنا نجرب المكياج على وشنا

وفي دقايق أتحولنا لبنتين صغيرين بيلعبوا مع بعض

نجرب المكياج و نمسحه و نشوف درجات الألوان مناسبة لبشرتنا ولا لأ

وهي تقولي ده عليكي حلو و أنا أقولها لأ أنتي محتاجة درجة أغمق من ده

وضحكنا و طبعا لقيت طلبي

وهي بتديني المكياج اللي أشتريته قالتلي

إنها قضت وقت سعيد معايا

كملت جولتي في السوق و أشتريت كمية سيجار لا بأس بها

و قعدت شوية أتفرج على المطار

مر من قدامي حد شبّهت عليه ... معقوله ؟ هي الدنيا بتلف بجد ولا أيه

ده كان زميل ليا في الجامعة بس عمري ما كلمته و لا كلمني

خصوصا أنه مش دفعتي

أيام الجامعة كان ليا واحده صحبتي مجنونة زييّ

فكنا بنسمي بعض الطلبة و الدكاترة بأسماء حركية خاصة بينا إحنا

الأتنين وبس ... مش عارفه ليه

يعني مثلا حد أسمه بطه و حد إسمه فلفل و حد إسمه عفاف (مع إنه ولد )

و حد أسمه فرخة ..إلخ

المهم الأخ ده كان من اللي حظهم إننا سمناهم

وكان إسمه الحركي شمس برضو مش عارفه ليه

بعد شويتين تلاتة كده تصادف إنه هو و أسرته وقفوا جنبي

أسرة مكونة من شمس و مراته و ولدين

كانوا واقفين ورايا

وبيسألوا بشكل عام عن ميعاد رحلة

فقولتله لو سمحت مش حضرتك أستاذ شم.... أأأأ .. أستاذ وليد ؟

قاللي أيوا ...قولتله أننا كنا زمايل و إني شاكة إنه هو

فمراته اللي بجد كانت ست لذيذة و مرحة جدا قالتلي

بس إنتي شكلك أصغر منه أوي أكيد مش دفعته

قولتلها أيوا أنا أصغر بدفعتين

المهم فهو عرّفني بيها و بولاده و هي كلمتني عن إبنها و إنه شقي

وقالتلي قوليله يا طنط إنه ميسيبش أيد مامته تاني في المطار

و إنتهى اللقاء بإبتسامة ثلاثية بينا

بجد الدنيا صغيرة

بس الغريب إننا لما بنحبها تصغر مش بتصغر

يعني في ناس يبقا نفسك تشوفهم صدفة و إبقا قابلني لو شوفتهم

المهم نرجع لموضوعنا

قضيت باقي اليوم بين الرسم و المسجد و الحمام و الفرجة على المكان

وعلى الناس و محاولات بائسة لفتح الفيس بوك على الموبيل

اللي بجد حسيته حتة خرده ولا ليها لازمة من غير شبكة

ومن قبل معاد الرحلة بساعة كنت متمسمرة على باب الGate

ومستنية الطيارة

وجت الطيارة و ركبتها و أنا عاوزة أبوسها و أقولها يااااااااااه يا عبد الصمد

في الطيارة قعدت جنبي بنت سعودية صغيرة حجما و جنبها واحد سعودي

ضخم الجثة عريض المنكبين وواضح إنهم مش مع بعض

عدى ساععتين من الرحلة يعني تلتينها و هم متكلموش مع بعض

وكسر الصمت ده لما طلبت شاي من المضيفة

ولأني كنت جنب الشباك فالبنت وصلتهولي من أيد المضيفة و شكرتها

وسألتني هو فاضل أد إيه ؟

بعدين سألتني أنا جاية زيارة ولا شغل

و بدوري سألتها و أنتي ؟

قالتلي إنها كانت في شهر العسل في دبي

وشاورتلي على الشاب اللي جنبها

واللي كان بيلعب جيمز على الموبيل

قولتلها معقول ؟ قالتلي آه

قولتلها أفتكرتكم مش مع بعض

قالتلي هو دا العادي إحنا مش بنتكلم مع بعض

وسكتنا و بعد شوية لقيته بيديلها الموبيل بتاعه من غير ما ينطق

وهي شالتهوله في شنطتها ....برضو من غير متنطق

لا تعليق

المهم

آخر و أظرف شخصية قابلتها كانت في المطار

طابوووووووور طويل عريض للغير سعوديين

وده من الحاجات اللي بجد بتضايقني جدا كل ما أدخل مطار سعودي

المهم وقف ورايا راجل ملامحه أجنبية

وكان مخنوق أوي إننا واقفين كل الطابور ده مع إن في شباكين تانيين فضيين

وبعد ما سألني

قولتله إنت أمريكي ؟ قاللي لأ أنا من لندن

قولتله على حد علمي لو أمريكاني كنت تعدي من أي شباك برحتك

بمنتهى الزوق أبدى إشمئزازه من اللي بيحصل

وبعد دقايق لمحت بسبوره في أيده

بسبور أحمررررررررررررررر

شاورتله على البسبور و قولته إنت لو روحت عند الشباك الفاضي

هيضربولك تعظيم سلام

قاللي لأ معتقدش و صمم حتى إنه ميحاولش يجرب

شوية و في عسكري خد باله من البسبور الأحمر

وراح شادد الراجل و قاله إنت إيه موقفك هنا

ساعتها أنا كمان كان جه دوري على الشباك التاني

فالراجل بصلي و كان والله في منتهى الإحراج

فأبتسمت و قولته

I told you

مش قولتلك ؟؟؟؟

فضل واقف و محرج يخلص إجراءاته و قعد يبص للطابور اللي كان واقف فيه

لغاية ما الظابط نده عليه و خد منه البسبور

بجد الناس دي راقية جدا و تقدمهم ده مش من فراغ

ده أنا بشوف ناس بتعمل عمايل في المطار و ألاعيب علشان ياخدوا دور بعض

وعمار يا مصر

المهم كملت الحكاية و روّحت البيت

و نمت كأني عمري في حياتي

ما شفت سرير

مش هقول يارب مكونش طولت في الكتابة

لأني عارفة و متأكده إني طولت

لكن ممكن أقول

آسفه للإطالة

شخابيط

....