كريسماس

أمنيتي في راس السنة
((يا ٢٠١٧ أرجوكي أرحلي بسلام))
لأول مرة في تاريخ مدونتي أكتب مباشرة للنشر بدون مسودة و مراجعة
يمكن لأني عاوزة الكلام يخرج من قلبي بدون تجميل
٢٠١٧
من أكتر السنين صخباً في حياتي كلها
لكن أبرز ما فيها إني اتعرفت بشخصيات و عوالم جديدة كتير
و فيها عرفت يعني إيه نفاق ومين هو المنافق لدرجة استفزتني للبحث عن صفات المنافق و مقارنتها باللي شفته
وكالعادة انطبق الواقع على كلام الرسول الكريم صلى الله عليه وسلم
( آيَةُ الْمُنَافِقِ ثَلاثٌ إِذَا حَدَّثَ كَذَبَ ، وَإِذَا وَعَدَ أَخْلَفَ ، وَإِذَا اؤْتُمِنَ خَانَ )
وده شدني للبحث أكتر في مصير الناس دي
يمكن علشان أثبت لنفسي ان حتى لو الدنيا مش بخير
فالآخرة هتكون بخير
ولقيت كلام الله عز وجل في كتابه الحكيم
بِسْم الله الرحمن الرحيم
الْمُنَافِقِينَ فِي الدَّرْكِ الأسْفَلِ مِنَ النَّارِ وَلَنْ تَجِدَ لَهُمْ نَصِيرًا *
صدق الله العظيم
بعدها ارتحت حتى البكاء
ارتحت لان في قاضي عادل هيحاكمنا كلنا في الآخر
قاضي نزيه .. وبعيد كل البعد عن الوساطة و المحسوبية و استغلال القوة و النفوذ
وجددت نيتي معاه اني أقابله بكتاب خالي من آيات النفاق
يمكن انا ظاهرياً شكلي مش متدين بمقاييس البشر
ويمكن لو حد قرأ كلامي يقول هي مين دي عشان تتكلم في الدين
لكن أحب اقول
ان الدين معاملة و ان ربنا رب قلوب
وان الطهر و النقاء الداخلي اهم بكتير من عباية واسعة او سبحة في الإيد
أرجوكم نبطل سطحية و نفكر و نتأمل
ربنا متكلمش في القرآن عن اللحية و تعدد مرات الحج و العمرة
لكن أتكلم عن الرحمة و الصدق و الوفاء بالعهد و حذّر من الظلم والبطش و القهر و الكدب والخيانة و النفاق
وأخيراً
بوجه كلامي تاني لسنة ٢٠١٧
شكراً إنك عرفتيني بنفسي أكتر
وأوعدك إني هحاول اهرب تاني للغربة
شخابيط

إختيارات

لما كنا صغيرين.. كانت الإختيارات سهلة و بسيطة .. كنا بنشاور على اللي نفسنا فيه ونطلبه من الكبار وهم بيتحملوا مسؤلية أي حاجة بعدها ..

كبرنا .. والإختيارات بقت صعبة جدا .. ياريت قلوبنا تكون بنفس قساوة عقولنا علشان نرتاح ... 

شخابيط

عصفرخة

الحدوتة للكبار فقط نظرا لكمية الواقعية النكدية اللي فيها

يلا نحكي حكاية (العصفرخة)

كان يا مكان في حاضر العصر و الأوان

عصفورة صغيوره لها جناحين سبحان من صوَر و أبدع في جمالهم

العصفورة كانت شقية و متهورة و مستعجلة تخرج من العش وتطير

وفضلت كتير تفكر في الطيران وكانت بتقول اشمعنا ابن الجيران ؟

لغاية ما جه اليوم اللي أتغيرت فيه حياتها

صحيت من النوم وراحت تبص من فوق حرف العش

لقت العصفور ابن الجيران طاير ومرفرف بجناحاته في الهوى

قالتله بسس بسس انت يا اسمك ايه

أنا فاضلي يومين و أطير زيك

وفجأة

وقعت العصفورة من العش وهي معلقه عنيها بيه لفوق

واتكسرو أجمل جناحين

مشيت العصفورة بين الشجر وفضلت تدور على مكان يكون لها عش جديد على الأرض

لكن المشكلة أنها مش عارفه تاكل

فضلت ماشيه لغاية ما وصلت لمزرعة فيها فراخ و بط ووز وأرانب

مبقتش عارفه ازاي تعرَفهم بيها

تقولهم أنا عصفورة ؟ مش هيصدقوها لأنها مش بتطير

دخلت العصفورة المزرعة

وبدأت تسأل الأرانب ...هو أنتم مين

قالولها احنا أرانب

قالت بس أنا مش شبهكم أنتم معندكوش ريش

وسألت البط .. هو أنتم مين ؟

قالولها أحنا البط

قالت بس أنا مش شبهكم أنتم منقاركم كبير

وقالت للوز ... أنتم رقبتكم طويلة

لغتية ما وصلت حظيرة الفراخ

وقالولها أحنا الفراخ

قالتلهم أنا اشبهلكم

عندي ريش و منقاري صغير

(وفي حزن قالت )

ومش بطير

قالولها في صوت واحد ... يعني أنتي مين ؟

ابتسمت وقالت

أنا (عصفرخة)

وعاشت وسطهم كتير

وباضت العصفرخة 5 بيضات

وكانت كل يوم تحاول تقنع نفسها أنها فرخة علشان تعيش

وبليل تبوس البيض وتقلَبه وتتأكد انه دافي و تنام وهي حضناه

وتحلم نفس الحلم

تحلم أن ولادها هييجي يوم و يكسرو قشر البيض

وتشوف مناقيرهم وهي خارجه من جوه البيض بتكسر القشر

وتحلم بيهم انه جه اليوم و طاروا من شباك الحظيرة مش من الباب

وبيرجعولها بحكايات جميلة عن الطيران

كل يوم نفس الحلم .. وتصحا العصفرخة من عز النوم

تقلب البيض و هي بتتمتم

اعملوا حسابكم هتتعلموا الطيران بدري و كمان هتتعلموه لوحدكم

منا مبعرفش اطير ولا عمري جربت الطيران

وفي ليلة كان الحلم جميل بزيادة

صحيت العصفرخة من النوم و قالت لازم أجرب حظي الليلة

وبأصرار غريب طلعت العصفرخة فوق سطح الحظيرة

وابتسمت لما تخيلت نفسها بين السحاب

وحاولت تطير

وقعت العصفرخة من فوق السطح

وللأسف

اتكسروا رجليها الاتنين

لما فاقت من الوقعة

فضلت تزحف ببطنها بسرعة ناحية عشها جوة الحظيرة علشان تلحق تدفي البيض

ولما وصلتله نامت فوقيه من التعب.. ودفي البيض

ونامت وهي بتسأل نفسها بصوت واطي .. هو أنا دلوقتي هيبقى أسمي ايه ؟

ورجعت تحلم العصفرخة بنفس الحلم

لكن ولادها في حلم الليلة مكانوش خارجين من البيض بمناقيرهم

كانوا خارجين برجليهم

بقلمي .. شخابيط